«Ազնավուրը հավերժ է իր երաժշտությամբ և իր թողած մշակութային ժառանգությամբ»․ այսօր Ազնավուրի հիշատակի օրն է

Այսօր լեգենդար հայորդի, ֆրանսահայ երգիչ, երգահան, գրող, կինոդերասան և հասարակական գործիչ, Հայաստանի ազգային հերոս Շառլ Ազնավուրի հիշատակի օրն է։

«Ամենակարևոր խոսքերը ես արդեն ասել եմ իմ երգերում...»․ՇԱՌԼ ԱԶՆԱՎՈՒՐ

Լեգենդար շանսոնիեյի երգերը գիտեն և սիրում են ողջ աշխարհում, և շատերի համար նրա ձայնը դարձել է ֆրանսիական ու հայկական միաձուլված մշակույթի յուրօրինակ խորհրդանիշ: Երևանի Շառլ Ազնավուրի անվան մշակույթի և արվեստի պետական քոլեջում ամենուր է թևածում Ազնավուրի մշակույթը, իսկ նրա երգերը հնչում են թե՛ իր օրիգինալ ձայնով, թե՛  Ազնավուրականների շուրթերից։

Քոլեջը 2022 թվականից հպարտությամբ է կրում լեգենդար շանսոնիեյի անունը, իսկ սաները՝ շարունակելով նրա գործը, խոստացել են աշխարհի բոլոր հարթակներում պատվով պահել մեծ հայի անունը։ Ազնավուրը հավերժ է իր երաժշտությամբ և իր թողած մշակութային ժառանգությամբ։